ఆపిల్ తొలి ఫోల్డబుల్ ఐఫోన్.. రోజుకు వందల యూనిట్లే తయారీ!

అమెరికాకు చెందిన ప్రముఖ టెక్ దిగ్గజం ఆపిల్ తన తొలి ఫోల్డబుల్ ఐఫోన్‌ను మార్కెట్లోకి తీసుకొచ్చేందుకు సిద్ధమవుతోంది. అయితే ఈ కొత్త మోడల్ తయారీలో కంపెనీ అనుసరిస్తున్న కఠినమైన నాణ్యత ప్రమాణాల కారణంగా ప్రారంభ దశలో ఉత్పత్తి వేగం చాలా తక్కువగా ఉన్నట్లు సమాచారం.

ప్రస్తుతం రోజుకు కొన్ని వందల ఫోన్లు మాత్రమే తయారవుతున్నట్లు టెక్ వర్గాలు చెబుతున్నాయి. విడిభాగాల కొరత కంటే.. ఫోన్ నాణ్యత విషయంలో ఎలాంటి రాజీ పడకూడదన్న ఆపిల్ నిర్ణయమే ఉత్పత్తి మందగించడానికి ప్రధాన కారణంగా తెలుస్తోంది.

ఫోల్డబుల్ ఐఫోన్‌కు సాంకేతిక సవాళ్లు

కొత్త ఫోల్డబుల్ ఐఫోన్ తయారీలో ఆపిల్‌కు పలు సాంకేతిక సవాళ్లు ఎదురవుతున్నట్లు తెలుస్తోంది. ప్రత్యేకమైన డిస్‌ప్లే, కొత్త మెటీరియల్స్, మడత పెట్టే హింజ్ వంటి అంశాల తయారీ ప్రక్రియ క్లిష్టంగా ఉండటంతో ప్రారంభ దశలో ఉత్పత్తి పరిమితంగా ఉండే అవకాశం ఉంది.

అయితే భవిష్యత్తులో ఉత్పత్తిని భారీగా పెంచాలని ఆపిల్ లక్ష్యంగా పెట్టుకున్నట్లు మార్కెట్ వర్గాలు అంచనా వేస్తున్నాయి.

ఫోన్‌లో ఉండనున్న ఫీచర్లు ఇవే..

ఆపిల్ తొలి ఫోల్డబుల్ ఐఫోన్ పుస్తకంలా మడతపెట్టుకునే బుక్-స్టైల్ డిజైన్‌తో వచ్చే అవకాశం ఉంది. ఇందులో సుమారు 7.8 అంగుళాల లోపలి డిస్‌ప్లే, 5.5 అంగుళాల బయటి స్క్రీన్ ఉండొచ్చని టెక్ వర్గాల్లో ప్రచారం జరుగుతోంది.

లిక్విడ్‌మెటల్ హింజ్ టెక్నాలజీ, A20 చిప్, ఆపిల్ సొంత C2 మోడెమ్ వంటి టెక్నాలజీలు ఇందులో ఉండే అవకాశం ఉంది. అలాగే ఫేస్ ఐడీకి బదులుగా పవర్ బటన్‌లోనే టచ్ ఐడీ ఫింగర్‌ప్రింట్ సెన్సార్‌ను అందించే అవకాశముందని సమాచారం.

ఈ ఫోన్‌కు డిస్‌ప్లేలను శాంసంగ్ సరఫరా చేయనున్నట్లు తెలుస్తోంది.

ధర రూ.2.50 లక్షల వరకు ఉండొచ్చా?

ఫోల్డబుల్ ఐఫోన్ ధర కూడా భారీగా ఉండే అవకాశం ఉంది. ఫోన్‌లోని ఫీచర్లు, టెక్నాలజీని బట్టి సుమారు రూ.1.70 లక్షల నుంచి రూ.2.50 లక్షల వరకు ధర ఉండొచ్చని అంచనాలు వినిపిస్తున్నాయి.

అయితే ఆపిల్ అధికారికంగా ఈ ఫోన్ స్పెసిఫికేషన్లు, ధర, విడుదల తేదీని ప్రకటించే వరకు ఇవన్నీ అంచనాలుగానే పరిగణించాలి.