యూపీఎస్సీ సీజీఎస్ఈ-2027 నోటిఫికేషన్ విడుదల.. 127 పోస్టులు

యూనియన్ పబ్లిక్ సర్వీస్ కమిషన్ (UPSC) కంబైన్డ్ జియో-సైంటిస్ట్ ఎగ్జామినేషన్ (CGSE)-2027కు నోటిఫికేషన్ విడుదల చేసింది. భూగర్భ శాస్త్రం, జియోఫిజిక్స్, కెమిస్ట్రీ తదితర విభాగాల్లో కేంద్ర ప్రభుత్వ ఉద్యోగాలను భర్తీ చేయనున్నారు. అర్హత ఉన్న అభ్యర్థులు సెప్టెంబర్ 2 నుంచి సెప్టెంబర్ 22 వరకు ఆన్‌లైన్‌లో దరఖాస్తు చేసుకోవచ్చు.

మొత్తం 127 ఖాళీలు

జియోలాజికల్ సర్వే ఆఫ్ ఇండియా పరిధిలో 111 పోస్టులు ఉన్నాయి. వీటిలో జియాలజిస్ట్, కెమిస్ట్, అసిస్టెంట్ జియాలజిస్ట్, అసిస్టెంట్ జియోఫిజిసిస్ట్, అసిస్టెంట్ కెమిస్ట్ పోస్టులు ఉన్నాయి.

సెంట్రల్ గ్రౌండ్ వాటర్ బోర్డులో 16 పోస్టులు భర్తీ చేయనున్నారు. సైంటిస్ట్-బి, అసిస్టెంట్ హైడ్రోజియాలజిస్ట్, అసిస్టెంట్ కెమిస్ట్, అసిస్టెంట్ జియోఫిజిసిస్ట్ తదితర ఉద్యోగాలు ఇందులో ఉన్నాయి.

విద్యార్హతలు

జియాలజీ సంబంధిత పోస్టులకు జియాలజీ, అప్లైడ్ జియాలజీ, జియోఫిజిక్స్, ఎర్త్ సైన్స్ తదితర సంబంధిత విభాగాల్లో మాస్టర్స్ డిగ్రీ అవసరం.

జియోఫిజిక్స్ పోస్టులకు ఫిజిక్స్, అప్లైడ్ ఫిజిక్స్ లేదా జియోఫిజిక్స్ వంటి విభాగాల్లో ఎంఎస్సీ ఉండాలి.

కెమిస్ట్ పోస్టులకు కెమిస్ట్రీ లేదా సంబంధిత స్పెషలైజేషన్‌లో మాస్టర్స్ డిగ్రీ అర్హతగా నిర్ణయించారు. హైడ్రోజియాలజీ పోస్టులకు జియాలజీ, అప్లైడ్ జియాలజీ లేదా హైడ్రోజియాలజీలో మాస్టర్స్ డిగ్రీ అవసరం.

వయోపరిమితి

అభ్యర్థుల వయస్సు సాధారణంగా 21 నుంచి 32 సంవత్సరాల మధ్య ఉండాలి. నిబంధనల ప్రకారం ఎస్సీ, ఎస్టీ, ఓబీసీ, ఎక్స్‌-సర్వీస్‌మెన్, పీడబ్ల్యూబీడీ అభ్యర్థులకు వయో సడలింపు ఉంటుంది.

ముఖ్యమైన తేదీలు

దరఖాస్తుల ప్రారంభం: సెప్టెంబర్ 2, 2026

దరఖాస్తుకు చివరి తేదీ: సెప్టెంబర్ 22, 2026

ప్రిలిమినరీ పరీక్ష: జనవరి 10, 2027

మెయిన్ పరీక్ష: జూన్ 19, 20, 2027

మూడు దశల్లో ఎంపిక

ఈ నియామక ప్రక్రియలో ముందుగా ప్రిలిమినరీ పరీక్ష నిర్వహిస్తారు. ఇది ఆబ్జెక్టివ్ విధానంలో ఉంటుంది. అనంతరం అర్హత సాధించిన వారికి మెయిన్ పరీక్ష నిర్వహిస్తారు. మెయిన్ పరీక్షలో మూడు పేపర్లు ఉంటాయి.

చివరి దశలో పర్సనాలిటీ టెస్ట్/ఇంటర్వ్యూ ఉంటుంది. ప్రిలిమ్స్‌కు 400 మార్కులు, మెయిన్‌కు 600 మార్కులు, ఇంటర్వ్యూకు 200 మార్కులు కేటాయించారు.

ఎలా దరఖాస్తు చేయాలి?

అభ్యర్థులు యూపీఎస్సీ అధికారిక ఆన్‌లైన్ పోర్టల్ ద్వారా దరఖాస్తు చేసుకోవాలి. దరఖాస్తు చేసే ముందు పూర్తి నోటిఫికేషన్‌లోని విద్యార్హతలు, వయోపరిమితి, పరీక్ష విధానం, ఇతర నిబంధనలను పరిశీలించాలి.

వివరాల కోసం: upsconline.nic.in