ముగిసిన సీఎం చంద్రబాబు, పవన్ కల్యాణ్ కీలక భేటీ.. స్థానిక సంస్థల ఎన్నికలపై కీలక నిర్ణయాలు!
ఆంధ్రప్రదేశ్‌లో రాజకీయ వాతావరణం ఒక్కసారిగా వేడెక్కింది. సచివాలయంలో ముఖ్యమంత్రి నారా చంద్రబాబు నాయుడు, ఉప ముఖ్యమంత్రి కొణిదెల పవన్ కల్యాణ్ మధ్య జరిగిన సుదీర్ఘ భేటీ ముగిసింది. దాదాపు రెండు గంటల పాటు సాగిన ఈ అత్యున్నత స్థాయి సమావేశంలో రాష్ట్రానికి సంబంధించిన పలు కీలకమైన రాజకీయ, పరిపాలనాంశాలపై ఇరువురు నేతలు సుదీర్ఘంగా చర్చించారు. ముఖ్యంగా రాబోయే స్థానిక సంస్థల ఎన్నికల వ్యూహాలపై ఈ భేటీలో అత్యంత ప్రాధాన్యత సంతరించుకుంది.
కూటమి ప్రభుత్వం అధికారంలోకి వచ్చిన తర్వాత జరుగుతున్న మొదటి స్థానిక పోరు కావడంతో, క్షేత్రస్థాయిలో పార్టీల బలాబలాలు, సమన్వయంపై ఇద్దరు నేతలూ ప్రధానంగా దృష్టి సారించారు.
స్థానాల సర్దుబాటుపై క్లారిటీ!
రాజకీయ వర్గాల నుంచి అందుతున్న నమ్మకమైన సమాచారం ప్రకారం... ఈ సమావేశంలో రాబోయే స్థానిక సంస్థల ఎన్నికల్లో తెలుగుదేశం, జనసేన, మరియు బీజేపీ కూటమి పార్టీల మధ్య సీట్ల సర్దుబాటుపై ప్రాథమిక అవగాహనకు వచ్చినట్లు తెలుస్తోంది. ఏ ఏ జిల్లాల్లో ఏ పార్టీ ఎక్కువ స్థానాల్లో పోటీ చేయాలి, క్షేత్రస్థాయిలో నేతల మధ్య ఎటువంటి విభేదాలు రాకుండా ఎలా సమన్వయం చేసుకోవాలనే అంశంపై చంద్రబాబు, పవన్ కల్యాణ్ దిశానిర్దేశం చేశారు. కూటమిలోని మూడు పార్టీల కార్యకర్తలు కలిసికట్టుగా పనిచేసి చారిత్రాత్మక విజయాన్ని సాధించడమే లక్ష్యంగా ప్రణాళికలు సిద్ధం చేశారు.
బీసీలకు 34 శాతం రిజర్వేషన్లు.. మంత్రి రాంప్రసాద్‌రెడ్డి కీలక వ్యాఖ్యలు
మరోవైపు ఈ భేటీ జరుగుతున్న తరుణంలోనే, రాష్ట్ర మంత్రి మండిపల్లి రాంప్రసాద్‌రెడ్డి స్థానిక సంస్థల ఎన్నికలపై కీలక వ్యాఖ్యలు చేశారు. స్థానిక సంస్థల్లో బీసీలకు 34 శాతం రిజర్వేషన్లు కల్పించేందుకు కూటమి ప్రభుత్వం చిత్తశుద్ధితో ఉందని ఆయన స్పష్టం చేశారు. బీసీల రాజకీయ సాధికారతకు తమ ప్రభుత్వం కట్టుబడి ఉందని చెబుతూనే... కేవలం ఈ ఎన్నికలను అడ్డుకోవడమే లక్ష్యంగా ప్రతిపక్ష వైఎస్సార్ కాంగ్రెస్ పార్టీ (YSRCP) కోర్టులను ఆశ్రయిస్తూ కుట్రలు పన్నుతోందని తీవ్రస్థాయిలో మండిపడ్డారు. కూటమి ప్రభుత్వం వచ్చిన తర్వాతే కేంద్రం నుంచి 15వ ఆర్థిక సంఘం నిధులు విడుదలయ్యాయని, ఈ ఎన్నికల్లో కూటమి విజయం ఖాయమని ధీమా వ్యక్తం చేశారు.
ఈ నేపథ్యంలో చంద్రబాబు-పవన్ కల్యాణ్ భేటీ ముగియడంతో, రాబోయే కొన్ని రోజుల్లోనే ఏపీలో స్థానిక సంస్థల ఎన్నికల నోటిఫికేషన్‌కు సంబంధించిన స్పష్టమైన ప్రకటన వచ్చే అవకాశం ఉందని రాజకీయ విశ్లేషకులు భావిస్తున్నారు.